44. Rex urbem Remorum obsidione premit. Rex
Rhodomi talia comperiens, Nortmannorum exercitum colligit copiosum, ac
collecto, redit, pagum Veromandensem ingrediens, penitusque depopulans. Accitis quoque Arnulfo, Erluino, Bernardo alio,
Theoderico comitibus, in urbem Remorum fertur. Eamque disposita circumquaque
obsidione cingit, eo quod Hugo ejusdem urbis episcopus quia ducis partibus
favebat, regi ingressum negabat. Primo ergo impetu, graviter dimicatum est. Nam
sagittariis hinc inde dispositis, qui in muro resistebant missilibus
sauciantur. Quibus amotis alii intacti succedunt, vices pugnae ingerentes. Sed
et extra telis ac lapidibus jactis, nonnulli afficiuntur, ceduntque. Sepe
tumultus reparantur, sepe ad portas, sepe ad murum comminus congressi. Animo
utrimque feroces, nullo modo cedere parant; numquam sibi usque ad internetionem
cessuri, nisi intercedentium supplicationibus obsidio soluta discessisset.
|