45. Dux regi per legatos, suadet ut ab obsidione
discedat. Dux namque in ipsa obsidione per legatos petiit, ut Ragenaldus comes
sumptis a sese obsidibus locuturus sibi occurrat. Quod et fieri ab rege
concessum est. Directus itaque sub obsidum jure ad ducem venit. Apud quem dux
diu deliberans, tandem agit, ut rex ab episcopo et urbanis obsides accipiens,
ab urbis oppugnatione discedat, quatinus quocumque et quando rex velit, idem episcopus
rationem redditurus accedat. Ragenaldus ducis animum regi perferens, ac
consilium approbans, id fieri suadebat. Obsidibusque sumptis idoneis, rex
obsidionem decima quinta die solvit, tempusque audiendae rationis post dies 40
sub ipsa Kalendarum Juliarum die constituit. Aliis ergo interim curatis, dies
habendi colloquii advenit. Et dux de superiore negotio locuturus, obvius regi
affuit. Declamatis autem eorum causis, vix sibi consentiebant. Rationibusque
non satis utiliter procedentibus, nihil paci commodum est, praeter quod sub
pace sequestra usque ad medium Augusti rationem distulere.
|