46. Obitus Theotilonis Turonensium episcopi. Quo
tempore cum beatae memoriae Theotilo Turonicae urbis praesul de renovanda inter
principes pace vehementissime certaret, atque his admodum occupatus studiis,
Lauduno discederet, peripleumonia in ipso itinere corripitur. Quae cum pulmonibus tumorem ac fervorem incuteret, die
quarta nati morbi hac vita migravit. Cumque adhuc in noctis tempesta spiritum
efflaret, mox luminis globus per aera ut fertur emicans, vigilantibus visus
est. Cujus lumine ad noctis depellendas caligines sufficienter usi, qui ejus
corpus exanime deferebant, per 150 miliaria usque urbem Turonicam hujus lucis
solamine, corpus beatissimum detulere, in basilica sancti Juliani martiris,
quod idem vir sanctus summa instruxerat religione, multa reverentia deponentes.
|