58. Dum haec gererentur, regum exercitus in ipsa
diei orientis aurora fluvio affuit, navesque paratas cum remis invenit, quas
tirones cum armis ingressi, navigant ac exaquantur. Tum circumquaque palantes,
nullo prohibente a diversis portibus alias rapiunt, et exercitibus deducunt.
Nam qui ruri degebant, irruentium metu omnes auffugerant. Dux vero Aurelianis
sese receperat. Unde et qui resisteret aberat. Navibus itaque conexis, ac multo
robore compactis, liburnas solidant. Quas ingressus exercitus, fluvium transit.
Dein terra recepti, incendiis praedisque vehementibus totam regionem usque
Ligerim depopulati sunt. Post haec feruntur in terram pyratarum ac solotenus
devastant. Sicque regis injuriam atrociter ulti, iter ad sua retorquent.
Ludovicus vero rex Remos redit.
|