60. (947.) Interea dux Neustriam combustam
direptamque dolens, exercitum parat, et in Arnulfum, cum in regem non auderet,
truculentus effertur. Oppida quoque illius aliquot impugnat. At cum per dies
sex nullum comprehendere posset, voto frustratus sua repetit. Quae dum a duce
gererentur, rex obsidione Mosomum premebat, eo quod ducis nepos Hugo a
pontificatu abjectus ibidem moraretur. Hunc itaque infestabat in ducis
contumeliam. At ducem ab obsidione discessisse comperiens, ipse quoque Remos
repetit. Qua etiam tempestate Bovo Catalaunensium episcopus, hac vita decessit.
Cui etiam mox successit ab rege, Gipuinus totius electione cleri, adolescens
egregius, atque a domno Artoldo Remorum metropolitano consecratur episcopus.
|