74. Oratio Rotberti pro Ludovico. Quibus palam
promulgatis, Rotbertus metropolitanus subinfert: Quoniam, inquiens, domni atque
serenissimi regis satis breviter ac dilucide digestam, optime ut arbitror
conquestionem percepimus, consequens videtur, ut ejus causam in quantum fas est
determinemus. Dux ergo quia omnia pene regni jura, in sese transfudit, eique
viribus reniti non valemus, mitius hoc attemptandum arbitror, ut qui Deum non
metuit, et hominem non reveretur, multa ratione multaque rerum consideratione,
ad normam Deo juvante reducatur. Igitur juxta patrum decreta, et canonum
regulam, inprimis ad satisfactionem fraterne monendus est, verbisque suasoriis
ad id modestissime revocandus. Quod si post blandam revocationis ammonitionem
resipiscere noluerit, omnium anathemate feriatur, hoc habentes praesidio, quod
jam a domno papa correctus sit, jussusque a domini sui insectatione quiescere.
|