78. Causa Artoldi. Post haec surgens Artoldus
archiepiscopus, rerum ordinem, sed et ipsius litis initium quae agitabatur
inter sese et Hugonem sibi subrogatum episcopum, luculentissime disseruit. Quin
et epistolam profert, nuperrime a domno papa sibi directam, per quam episcopatum
sibi retinendum significabat. Post cujus interpretationem, Sigeboldus quidam
praedicti Hugonis clericus, aliam mox epistolam sinodo porrexit, signo domni
papae munitam, et ab Urbe a sese delatam. Quae etiam in conspectu episcoporum
recitata atque diligentissime discussa est. In cujus textu id solum dicebatur,
quod Rodulfus Laudunensis episcopus, Wido etiam Suessonicus, necnon et
Hildegarius Belvacensis, ceterique Remensis dioceseos episcopi, ad sedem
apostolicam pro restitutione Hugonis, et abdicatione Artoldi, epistolam
miserint. Unde et domnum papam ad eorum vota, eorumque petitionem, omnia fieri
velle. Post
cujus recitationem, praedicti mox consurgentes episcopi, epistolae sententiam
penitus confutarunt ac calumniarum injectorem hominem perditissimum adclamarunt.
Quibus cum contraire non posset, quibusdam maledictis eos adortus, publice de
perfidia criminabatur.
|