80. Secunda vero die, post recitatas sacrae auctoritatis
lectiones, et domni Rotberti allocutionem, a venerabili Marino constituitur, ut
quoniam juxta sacrae legis sententiam, pontificalis dignitas Artoldo restituta
est, in ipsius pervasorem sinodalis proferatur censura. Recitantur itaque
decreta canonum, et sanctorum instituta patrum, Innocentii, Alexandri,
Simmachi, Sixti, Celestini, Zozimi, Leonis, Bonefacii, aliorumque sanctae Dei
aecclesiae doctorum illustrium. Quorum decretis, unanimiter anathematizant,
atque ab totius aecclesiae communione sequestrant, Hugonem Remensis aecclesiae
pervasorem, donec resipiscentem peniteat, ac pro facinore offensis satisfaciat.
|