84. Rex Montem acutum capit. Rex vero castrum
quod dicitur Mons-acutus, quod etiam est Lauduno contiguum, cum exercitu
oppugnabat. Et quia non satis adhuc murorum firmamento claudebatur, nec
multitudo militum sufficiens commode ibi cohabitare poterat, urgenti obsidioni
diutius resistere oppidani non patiuntur. Victi ergo cedunt, ac resistere
quiescunt. Oppido itaque capto, rex suos deputat, et sic exercitum Lauduno
inducit; obsidionem per loca commoda disponit, viresque admodum confert.
Saepissime eminus decertatum est. Comminus etiam dimicatum novies. Nullo vero
prosperioris fortunae successu, regius impetus eo tempore enituit. Imminebat
etenim hiemis intemperies, unde et bellicae machinae in articulo temporis
fabricari non poterant, sine quibus tanti montis eminentia expugnari non
potest. Regis
itaque jussu exercitus redit, hieme transacta rediturus. Rex vero Remis sese
privatum recepit.
|