85. Hugo autem dux, episcoporum anathema
vilipendens, ac regi subdi contempnens, cum multis Nortmannorum copiis regiam
urbem Suessonicam aggreditur, multaque obsidione premit. Alios itaque adortus gladio enecat, alios vero nube
sagittarum ac balistarum loetaliter sauciat. Injectisque jaculo ignibus, domum
matris aecclesiae succendit. Claustrumque canonicorum ac partem civitatis
majorem, ignibus solo tenus combussit. Quam cum capere non posset, in pagum
Remensem ubi rex tunc privatus morabatur, iter truculentus reflectit. Cujus adventum ii
qui ruri degebant audientes, in aecclesias sanctorum cum suis rebus confugiunt.
At tirannus pauperum turbis inmisericors, eorum plus quam 560 intra aecclesias
succendisse traditur. Et sic ad sua refertur.
|