2. Universorum itaque consensu, a domno Artoldo
Remorum metropolitano, favente Brunone ejus avunculo, principibusque diversarum
gentium laudantibus, Lotharius duodennis, rex creatur in basilica sancti
Remigii, ubi pater suus tumulatus cum aliis regibus sepultis quiescebat.
Creatusque rex, a matre Gerberga simulque et principibus Laudunum, ubi ex
antiquo regia esse sedes dinoscitur, magna rerum ambitione inclitus deducitur.
Dux continue ei individuus assidet; et ad multam regis benivolentiam animum
intendens, postquam principes in sua discessere, privatis cum rege colloquiis
coutebatur. Et ut suae fidelitatis virtutem penitus demonstraret, regem ejusque
matrem suas urbes et oppida in tota Neustria visere petit, obtinetque.
|