3. Deducitur ergo a duce rex cum matre regina
per Neustriam, ac ab eo decentissime excipitur Parisii, Aurelianis, Carnoti,
Turonis, Bleso, aliisque quam plurimis Neustriae urbibus oppidisque. Inde
quoque cum exercitu in Aquitaniam feruntur. Et praemissis legatis, cum Wilelmus
princeps occurrere nollet, Pictavim adoriuntur, principem ibi esse rati. Cum
ergo exercitus vehementissime urbem attereret, et diutissime pugnam urbanis
inferret, a quibusdam regiis castrum sanctae Radegundis urbi contiguum,
clandestina irreptione captum atque succensum est. Comperto vero principem non
adesse, tandem post duorum mensium dies, victus indigentia exercitu fatigato,
ab obsidione disceditur.
|