8. Pater meus itaque ad oppidum praedicti
Rageneri quod dicitur Mons castratiloci, ubi etiam uxor ejus cum duobus filiis
parvis morabatur, quosdam suorum quos ipse in militaribus instruxerat dirigit,
qui loci habitudinem militumque numerum, rerum etiam fortunam ac famulorum
exitum, vigilumque diligentiam, cautissime considerent. Procedunt itaque duo
tantum in habitu paupertino, ac usque ad oppidi portam deveniunt. Exstruebantur
tunc muri per loca potioribus aedificiis. Unde et lapidum caementique
portitores, saepe per portam egrediebantur, regrediebanturque praesente eorum
qui operi praesidebat. Adsunt exploratores, et ad comportandum lapides
offerunt sese. Deputantur operi. Daturque eis clitellaria sporta. Comportant
itaque caementum ac lapides, ac nummos singulos, singuli in dies accipiunt.
Ante dominam etiam cum latomis et caementariis bis cibati sunt, curiose omnia
contemplantes. Dominae etiam cubiculum, ejusque natorum diverticulum, sed et
famulorum egressum et regressum, actionumque tempestatem, ubi etiam oppidum
insidiis magis pateat, multa consideratione pernotant. Et diebus quatuor
consumtis, dies imminebat dominica. Sicque accepta laboris mercede, ab opere
soluti sunt. Redeunt igitur omnibus exploratis, ac patri meo talia referunt.
|