11. (959.) His ita gestis, Rotbertus Trecarum
princeps, Heriberti tiranni filius, Hugonis vero abdicati frater, Lothario regi
injuriam hac arte molitus est. Castrum regium quod Divion dicitur, secus
Oscaram torrentem conditum, multa cupiditate sitiebat, eo quod per eum si id
habere posset, optimam Burgundiae partem ad suum jus transire posse
arbitrabatur. Illum itaque qui castro
praeesse videbatur, de transfugio ad sese per legatos alloquitur, plurima
spondens, et majora sub jurejurando pollicens. Apud regem quoque multam rerum
inopiam asserens, apud sese vero sufficientes opes, oppida nonnulla, aliaque
desiderabilium insignia vehementissime protestans. Tunc juvenis rerum cupidine
captus, pro transfugio mercedem quaerit. At illi mercedis nomen edicunt. Ille vero ex promissis jusjurandum postulat, capitque.
Et tempore congruo, tirannum cum multa militum manu, intra oppidum excipit, ac
sese ei commitens, fidem pro militia accommodat. Pervaso autem oppido, regii
milites contumeliose pelluntur. Deputantur vero ibi milites tiranni.
|