25. Monachorum quoque mores, quanta dilectione
et industria correxit, atque a seculi habitu distinxit, sat dicere non est. Non
solum enim religionis dignitate eos insignes apparere studuit, verum etiam
bonis exterioribus augmentatos nullo modo minui prudens adegit. Quos cum multo
coleret amore, praecipua tamen beati Remigii Francorum patroni monachos
caritate extollebat; unde et eorum res stabiliri in posterum cupiens, Romam
concessit (971?). Et utpote vir nobilis et strenuus, et fama celibis vitae
omnibus clarus, a beatae memoriae Johanne papa, cum multa reverentia exceptus
est. A quo etiam post mutua colloquia jussus, in die natalitia Domini duodecim
praecedentibus episcopis missarum sollempnia celebravit. In tanta ejus gratia
habitus, ut ab eo rogaretur petere, si quid optaret.
|