34. Responsio primatis et in pravos indignatio.
Ad haec abbatum primas: Quod hic, inquit, a te promulgatum est pater
sanctissime, alta memoria condendum est, eo quod et corporum dignitatem, et
animarum salutem affectes. Constat enim ad habitum virtutis neminem pervenisse,
nisi quem talis animus munivit, quo et appetenda peteret, et vitanda
refelleret. Unde et patet nos aliquid dedecoris contraxisse, quod ab appetendis
aliquanto aberravimus. Quod etiam multa objurgatione reprehendendum est, cum
nec ignavia nos praecipitaverit, nec inopia ad id impulerit.
|