36. Secunda primatis objectio. Rursusque primas
exorsus: Adhuc, inquit, nostro ordini inimica proferam. In quo quidam
dinoscuntur, quibus mos inolevit, ut soli a monasteriis egrediantur, soli foris
nullo sui operis teste maneant, et quod pessimum est, absque fratrum
benedictione et exeant, et sine ea redeant. Unde non dubium est, eos facilius
posse falli, quos fratrum orantium benedictio non munit. Inde est quod
turpitudo vitae, morum pravitas, proprietatis peculium, nobis a calumniantibus
intenduntur. Unde etiam necesse est, ut his calumniis subdamur, cum repulsioni
testes habere non possimus. Hoc quoque vestra censura prohibeat. Sinodus dixit:
Prohibeatur. Et memorabilis metropolitanus: Hoc quoque, inquit, nostra
auctoritate prohibemus.
|