54. Confectio abaci. In geometria vero non minor
in docendo labor expensus est. Cujus introductioni, abacum id est tabulam
dimensionibus aptam opere scutarii effecit. Cujus longitudini, in 27 partibus
diductae, novem numero notas omnem numerum significantes disposuit. Ad quarum
etiam similitudinem, mille corneos effecit caracteres, qui per 27 abaci partes
mutuati, cujusque numeri multiplicationem sive divisionem designarent; tanto
compendio numerorum multitudinem dividentes vel multiplicantes, ut prae nimia
numerositate potius intelligi quam verbis valerent ostendi. Quorum scientiam
qui ad plenum scire desiderat, legat ejus librum quem scribit ad C.
grammaticum; ibi enim haec satis habundanterque tractata inveniet.
|