55. (969.) Fama Gerberti per Gallias et Italiam
diffusa. Fervebat studiis, numerusque discipulorum in dies accrescebat. Nomen
etiam tanti doctoris ferebatur non solum per Gallias, sed etiam per Germaniae
populos dilatabatur. Transiitque per Alpes, ac diffunditur in Italiam,
usque Thirrenum, et Adriaticum. Quo tempore, Otricus in Saxonia insignis
habebatur. Hic cum philosophi famam audisset, adverteretque quod in omni
disputatione, rata rerum divisione uteretur, agebat apud suos, ut aliquae rerum
divisarum figurae, ab scolis philosophi sibi deferrentur, et maxime
philosophiae, eo quod in rata ejus divisione, perpendere ipse facilius posset,
an recte is saperet, qui philosophari videbatur, utpote in eo quod divinarum et
humanarum scientiam profitetur. Directus itaque est Remos, Saxo quidam, qui ad
haec videbatur idoneus. Is cum scolis interesset, et caute generum divisiones a
Gerberto dispositas colligeret, in ea tamen maxime divisione, quae philosophiam
ad plenum dividit, plurimum ordine abusus est.
|