61. Reprehensio divisionis ab Otrico inutilis,
ac Gerberti responsio. Nisusque quod reliquum erat prosequi, Otricus
subintulit: Miror inquiens vehementissime, quod phisicae mathematicam sic de
propinquo subdidisti, cum inter utramque subalternum genus intelligi possit
phisiologia. Vitiosum etenim valde videtur, si nimis longe petita pars, ad
generis conferatur divisionem. Ad haec Gerbertus: Inde, inquit, vehementius
mirandum videtur, quod mathematicam phisicae, suae videlicet coaevae, ut
speciem subdiderim. Cum enim coaevae sub eodem genere habeantur, majore inquam
admiratione dignum videtur, si alteri altera subdatur. Sed dico phisiologiam
phisicae genus non esse quemadmodum proponis, nullamque earum differentiam
aliam assero, nisi eam quam inter philosophiam et philologiam cognosco. Alioquin philologia
philosophiae genus conceditur. Ad haec scolasticorum multitudo philosophiae
divisionem interruptam indignabatur, eamque repeti apud augustum petebat.
Otricus vero post paululum idem repetendum dicebat, prius tamen habita ratione
de causa ipsius philosophiae; intendensque in Gerbertum, quae esset causa
philosophiae sciscitabatur.
|