67. Ottonis promotio in regem per Germanos et
Belgas. Post obitum domni Ottonis Germanorum regis, ejus filius Otto, a
Germanis Belgisque rex creatus, rem publicam strenue atque utiliter
amministravit; vir magni ingenii, totiusque virtutis, liberalium litterarum
scientia clarus, adeo ut in disputando ex arte et proponeret, et probabiliter
concluderet. Penes quem regnum Germaniae cum Galliarum aliqua parte, usque ad
diem vitae ejus supremum, mansit, sed aliquando dubio statu. Nam inter ipsum et
Lotharium Gallorum regem, quandoque et odium immane, et anceps victoria fuit.
Etenim cum ab Ottone Belgica teneretur, et a Lothario impeteretur, contra se
dolos aut vires moliebantur, eo quod uterque et suum patrem eam tenuisse
contenderet, et exercituum multitudine, uterque eam se defensurum non
diffideret. Nam et Ludovici patris Lotharii fuit, et ejus post dono, hujus Ottonis
pater, Otto obtinuit. Horum ergo discordiae incentivum principium Belgica fuit.
|