74. Equitatus in Galliam. Interea Otto cum triginta milibus equitum in Gallias
ire parabat. Nec moratus praemissis centurionibus ibat. Galliam Celticam exercitu
implevit. Quam partim combussit, partim depopulatus est. Sic etiam versa vice Lotharium
adurgens, eo quod militum copiam non haberet, fluvium Sequanam transire
compulit, et gemebundum ad ducem ire coegit. Turbati ergo repentino hostium adventu, rex Stampas adiit, dux vero ad
colligendum exercitum Parisii resedit. Dum haec aguntur, Otto cum exercitu
properat, fiscumque regium Atiniacum diripit atque comburit; et per fines urbis
Remorum transiens, sancto Remigio multum honorem exhibuit. Urbem quoque
Suessorum praetergressus, et sanctum Medardum venerans, palatium Compendiense
pene diripuit. Nec minus centuriones praevii eo ignorante sanctae Baltildis
monasterium, apud Chelas penitus subruerunt atque combusserunt. Quod non
mediocriter dolens multa in ejus restaurationem delegavit. Tandem ad fluvium
Sequanam accessit, ibique exercitus tentoria fixit, Parisium in prospectu
habens, totamque pene regionem per triduum depopulatus est.
|