80. Responsio Ottonis ad Gallos. Ad haec Otto:
Novi, inquit, quantam labem rei publicae discordia sepenumero intulit, cum
regnorum principes contra se aliquando moliti sunt. Nec illud etiam ignoro,
quanta salus per amiciciae virtutem rei publicae comparata sit. Fateor hactenus
me plurimum coluisse pacem et concordiam, invidias atque discordias
malignantium odio semper habuisse. Componantur ergo per vos animi dissidentium,
nam huic rei vos video aptissimos, qui ante hac mutua lesione rei publicae
plurimum derogavimus. Consilii vestri rationem approbo. Dictis tandem facta
consentiant. Legati persuasione habita redeunt, ambosque reges alterutrius
benivolentium ad alterutrum referentes, in amicicia componunt. Constituitur tempus
colloquendi. Locus utrique commodus deputatur. Et quia circa fluvium Mosam
regna amborum conlimitabant, in locum qui Margolius dicitur, eis sibi occurrere
placuit.
|