91. Promotio Ludovici in regnum Francorum.
Etenim cum rex filium suum Ludovicum in regno sibi succedere vellet, ipsum
quoque a duce ordinandum quaereret, dux hanc ordinationem mox liberali animo se
administraturum respondit. Et legatis directis, regnorum principes Compendii
collegit; ibique a duce reliquisque principibus Ludovicus rex adclamatus per
metropolitanum episcopum Remorum, dignae videlicet memoriae Adalberonem, sancta
die Pentecostes in regnum Francorum promotus est. Duobus ergo regnantibus dux
multa affabilitate ac famulatu multiplici, per dies plures sese commendabat;
adeo regiam dignitatem per omnia extollens, et sese eis supplicem monstrans; se
etiam facturum pollicens, ut ambo gentibus jam domitis potenter imperarent,
indomitas quoque efficaciter mansuescerent. Id etiam meditabatur, ut in
diversis regnis positi, regiam dominationem exercerent, ne unius regni
angustia, duorum regum majestati nimium derogaret.
|