92. Item promotio Ludovici in regnum Aquitaniae
ejusque uxoratio. Dum haec multo conatu disponeret, alii quidam nimis callidi
hoc comperto, cum hujusmodi gloriam in sese transfundere vellent, Emmam reginam
adeuntes, super maxima re se consulturos dixerunt. Qui suscepti a regina, id
sibi videri optimum dixerunt, Ludovico regi assciscendam conjugem Adelaidem,
Ragemundi nuper defuncti ducis Gothorum olim uxorem. Et non magis potentiam
regnandi ex hoc posse augeri, quam sibi nonnulla commoda adquiri. Enimvero
possibile fieri, totam Aquitaniam simulque et Gothiam suo imperio asstringi
posse, postquam ex jure ductae uxoris oppida munitissima ad suum jus
retorqueret. Magnum etiam quiddam in hac re, et utile comparari, si patre hinc
posito, et illinc filio, dux ceterique hostes in medio conclusi, perpetuo
urgeantur.
|