103. Virduni invasio a Belgis. Dum haec multa
consultatione ventilaret, Belgicae dux Teodericus, necnon et vir nobilis ac
strenuus Godefridus, Sigefridus quoque vir illustris, Bardo etiam et Gozilo
fratres clarissimi et nominatissimi, aliique principes nonnulli, latenter
pertemptant Virdunum irrumpere, eamque a Gallis evacuare. Factisque insidiis,
negotiatorum claustrum, muro instar oppidi exstructum, ab urbe quidem Mosa
interfluente sejunctum, sed pontibus duobus interstratis ei annexum, cum
electis militum copiis ingressi sunt. Annonam omnem circumquaque milites
palantes advectare fecerunt. Negotiatorum quoque victus in usum bellicum
acceperunt. Lignorum trabes ex Argonna aggregari jusserunt, ut si ab hostibus
extra machinae muris applicarentur, ipsi quoque interius obtinentibus machinis
obstare molirentur. Crates quoque viminibus et arborum frondibus validas
intexuerunt, machinis erectis, si res exposceret, supersternendos. Sudes ferro
acuminatos, et igne subustos, ad hostes transfodiendos quamplures aptaverunt. Missilia varii generis per fabros expediere. Funium
millena volumina ad usus diversos convexerunt. Clipeos quoque habendae
testudini ordinandos, instituerant. Preterea centena mortis tormenta non
dufuere.
|