104. Repetito Virduno a Lothario. Nuntiantur
haec Lothario. Qui tantum facinus accidisse acerrime indignatus, exercitum
dimissum revocavit; et sic cum decem milibus pugnatorum Virdunum petiit, atque
adversarios repentinus aggressus est. Primo impetu, sagittarii contra hostes
ordinati sunt. Missaeque sagittae et arcobalistae cum aliis missilibus tam
densae in aere discurrebant, ut a nubibus dilabi, terraque exsurgere
viderentur. Horum contra impetum, testudinem ante se et super capita hostes
muro aptavere; in quam relisa missilia, ictu frustrato decidebant. Hoc impetu
facto Galli circumquaque obsidionem disposuere; fossisque praeruptis,
obfirmaverunt castra, ne si ad incautos adversarii prosilirent, accessum
facilem invenirent.
|