30. His ergo in utraque parte paratis, uterque
exercitus signis collatis congreditur. Rotbertus cum Neustriis, Dalmatius cum
Aquitanis legiones piratarum penetrant, statimque ab iis qui in cornibus erant,
a tergo impetuntur. Mox quoque et Belgae inprovisi prosequuntur, atque piratas
qui a tergo suos premebant, immani cede sternunt. Neustrii quoque atrocissime
instant. In qua commixtione, cum Aquitani piratis circumdati, multo conamine
eos quos impellebant in fugam cogerent, ii qui in cornibus perstiterant, a
Belgis hinc premebantur, inde vero ab Aquitanis conversis letaliter urgebantur.
Superati itaque arma deponunt, ac multis clamoribus pro vita supplicant.
Rotbertus itaque tantae caedi parcere petit, ac instat ut eruantur. Vix quoque
ab caede quievit exercitus, multo prosperioris fortunae incitatus successu.
Sedato vero tumultu, qui inter eos potiores videbantur, a duce capti sunt,
reliqui vero sub jure obsidum ad classem redire per mittuntur.
|