33. Et die constituta, sinodus habita est. In
qua primum de pace et religione sanctae Dei aecclesiae, statuque regni
Francorum salubriter ac competenter tractatum est, post vero de piratarum
mitigatione atque conversione uberrime agitatum. Decretum quoque de eodem ab
ipsa Divinitate rationem quaerendam, jejunandum etiam ab omnibus triduo. Domno
vero papae id esse suggerendum, ut invocata per jejunium Divinitate, et domno
papa humiliter consulto, efficatius res ordinaretur. Revolutis itaque patrum
decretis, reverendus metropolitanus Heriveus 24 capitula in volumine ordinavit,
rationabiliter ac utiliter digesta, et qualiter rudes in fide habendi sunt
continentia. Quae omnia venerabili Rodomensi Witoni delegavit. Ille vero
excipiens, utiliter sumptum negotium consummavit.
|