34. Hac etiam tempestate Ragenerus, vir
consularibus et nobilis cognomento Collo longus, cujus etiam obitus multam rei
publicae in Belgica intulit labem, communi corporis valitudine tactus et
oppressus, finem vitae apud Marsnam palatium accepit. Cujus exequiis Karolus
rex interfuisse dicitur, ac oculos lacrimis suffusus dixisse: O inquiens ex
alto humilem, ex amplo artissimum! altero personam, altero monumentum
significans. Peractisque exsequiis, Gisleberto ejus filio, jam facto juveni,
paternum honorem, coram principibus qui confluxerant liberalissime accommodat.
|