28.
Rex per Rotgerum comitem Wilelmum ducem sibi conciliat. Etenim rex bonorum usus
consilio, Rotgarium virum clarum Wilelmo pyratarum principi pro se locuturum
direxit. Qui apud eum pro rege optime functus legatione, ibi rebus humanis
excessit. Ante tamen principi usque ad effectum suasit. Nam non multo post
suorum legatione regem fideliter accersit, exceptumque Rodomi, ingentibus donis
dignissime accumulat. Unde et factum est, ut alii hinc formidantes, ad regem tempestivius
sese contulerint. Wilelmus itaque Aquitanorum dux, Brittanorumque Alanus,
piratas regiam rem curare comperientes, accessum maturant, regem adeunt, atque
fide pacti miliciam jurant. His itaque rex collectis, praedictis tirannis secus
fluvium Isara locuturus procedit. Tiranni regium equitatum suspectum habentes,
praevenerunt, atque pontes praecipitaverunt, naves circumquaque in aliud litus
abducentes. Sicque cum suis in adverso fluminis litore consederunt. Duabus
tantum naviculis hinc inde cursitantibus, per internuntios controversia inter
illos agitata est. Tandem sub pace sequestra obsidum jure a sese discedunt.
|