68.
His ita gestis, Artoldus epistolam ad sedem Romanam dirigit, commodissime
continentem, et suarum injuriarum seriem, et regis incommodorum tenorem. Domnus
itaque Agapitus papa, ad multam benivolentiam animum intendens, mox accersit
venerabilem Ostiensem episcopum Marinum, magnae aequitatis et prudentiae virum,
vim epistolae ei explicans, et ad rerum correctionem illum vehementissime
hortans. Mittitur ergo venerabilis
Marinus, domni papae vicarius, ad Ottonem regem, ob evocandam atque
congregandam universalem sinodum. Diriguntur et epistolae specialiter aliquot
episcopis tam Germaniae quam Galliae, ad rerum aequitatem suasoriae.
|