83.
Rex cohortes Mosomum mittit et capit. Interea exercitu ex omni Belgica duce
Conrado apud regem collecto, tres cohortes rege jubente Mosomum mittuntur.
Compererat etenim Hugonem abdicatum ibidem reclusum, multaque rei militaris
inopia eum haberi. Cohortes ergo oppidum
in ipso crepusculo aggressae, repentina oppugnatione circumquaque infestant.
Instant quoque magnanimiter capere. Et quia revera milites paucissimos, armaque
vix aliqua sciebant, indesinenter vires exerunt, armisque adurgent. At aliis
fatigatis, alii intacti succedunt. Sicque sine intermissione paucissimos,
numerosi atterunt. Oppidani vero assidua expugnatione attriti, die altera jam
sole occiduo omnes cum domino ad deditionem coguntur. In quo tumultu, quo
genere fugae nescitur, Hugo abdicatus evadit. De militibus vero qui potiores
videbantur, capiuntur, ac oppido aliis deputatis, regi deducuntur.
|