101. Virduni expugnatio. Quae civitas eo situ posita est, ut a fronte, planitie
pervia meantibus accessum praebeat; a tergo inaccessibilis sit. Ibi enim a
summo in posteriora, profundo hiatu circumquaque distenditur. Ab inferioribus
vero ad summum, rupibus praeruptis artatur. Quae non solum scatens fontibus,
puteisque, incolis accommoda, sed et fluvio Mosa eam a praerupta parte
abluente, nemorosa. Ubi ergo a fronte planitien praefert, pugnaturi machinas
bellicas generis diversi aptavere. Nec minus qui in urbe erant, ad resistendum
sese expediebant. Pugnatum est tandem octo ferme continuis diebus. At cives cum
viderent nulla a suis extrinsecus suffragia mitti, nec jugis praelii pondus se
tolerare posse, consilio inito indempnes et intacti hostibus cessere. Urbem aperuerunt,
et sese Lothario victi obtulerunt.
|