CAPUT II.

De poenitentiis.

Can. 2312. par. 1. Poenitentiae in foro externo imponuntur ut delinquens vel poenam effugiat, vel poenae contractae absolutionem aut dispensationem recipiat.

par. 2. Ob delictum aut transgressionem occultam nunquam poenitentia publica imponatur.

par. 3. Poenitentiae non tam secundum quantitatem delicti, quam secundum poenitentis contritionem moderandae sunt, pensatis qualitatibus personarum et delictorum adiunctis.

Can. 2313. par. 1. Praecipuae poenitentiae sunt praecepta:

1. Recitandi determinatas preces;

2. Peragendi piam aliquam peregrinationem vel alia pietatis opera;

3. Servandi peculiare ieiunium;

4. Erogandi eleemosynas in pios usus;

5. Peragendi exercitia spiritualia in pia aut religiosa domo per aliquot dies.

par. 2. Poenitentias Ordinarius pro sua prudentia addere potest poenali remedio monitionis et correptionis.