Textus

In nomine Patris et Filii et Spiritus Sancti.
Benedicat vobis Dominus et custodiat vos.
Ostendat faciem suam vobis et misereatur vestri.
Convertat vultum suum ad vos et det vobis pacem, 
sororibus et filiabus meis,
et omnibus aliis venturis et permansuris in vestro collegio 
et ceteris aliis tam praesentibus quam venturis,
quae finaliter perseveraverint in omnibus 
aliis monasteriis pauperum dominarum.

Ego Clara, ancilla Christi, plantula beatissimi patris nostri sancti Francisci, soror et mater vestra et aliarum sororum pauperum, licet indigna,  rogo Dominum nostrum Jesum Christum per misericordiam suam et intercessionem sanctissimae suae genitricis sanctae Mariae et beati Michaëlis archangeli et omnium sanctorum angelorum Dei, beati Francisci patris nostri et omnium sanctorum et sanctarum, ut ipse Pater caelestis det vobis et confirmet istam santissimam suam benedictionem in caelo et in terra:  in terra, multiplicando vos in gratia et in virtutibus suis inter servos et ancillas suas in Ecclesia sua militanti;  et in caelo, exaltando vos et glorificando in Ecclesia triumphanti inter sanctos et sanctas suas.

Benedico vos in vita mea et post mortem meam, sicut possum, de omnibus benedictionibus, quibus Pater misericordiarum filiis et filiabus benedixit et benedicet in caelo et in terra,  et pater et mater spiritualis filiis suis et filiabus spiritualibus et benedixit et benedicet. Amen.

Estote semper amatrices animarum vestrarum et omnium sororum vestrarum, et sitis semper sollicitae observare quae Domino promisistis.
Dominus vobiscum sit semper et utinam vos sitis semper cum ipso. Amen.