68.1
Gaius Marius filius uiginti septem annorum consulatum inuasit, quem honorem tam
immaturum mater fleuit. 2 Hic patri saeuitia similis curiam armatus obsedit,
inimicos trucidauit, quorum corpora in Tiberim praecipitauit. 3
In apparatu belli, quod contra Syllam parabatur, apud Sacriportum uigiliis et labore
defessus sub diuo requieuit et absens uictus fugae, non pugnae interfuit. 4
Praeneste confugit, ubi per Lucretium Afellam obsessus temptata per cuniculum
fuga, cum omnia saepta intelligeret, iugulandum se Pontio Telesino praebuit.
|