5.1
Ancus Marcius, Numae Pompilii ex filia nepos, aequitate et religione auo
similis, Latinos bello domuit. 2 Murcium et Ianiculum
montes urbi addidit, noua moenia oppido circumdedit. Siluas ad usum nauium
publicauit. Salinarum uectigal instituit. 3 Carcerem
primus aedificauit. Ostiam coloniam maritimis commeatibus opportunam in ostio
Tiberis deduxit. 4 Ius fetiale, quo legati ad res repetundas uterentur,
ab Aequiculis transtulit, quod primus fertur Rhesus excogitasse. 5 His rebus confectis
intra paucos dies immatura morte praereptus non potuit praestare qualem
promiserat regem.
|