BOLESLAUS III CRIVOUSTUS

Hic quinquaginta pugnavit proelia signis

Collatis, casu non variante fidem.

Pugnavit quoties, toties et vicit; eorum

Nomina, quos vicit, quod breve claudat opus?

Caesaris Henrici magnas fudisse cohortes

Sat sibi, si deessent cetera, laudis erat.

Maerore interiit, quod prorsus inermis ab hoste [est]

Foedifrago victus fraude doloque semel.

I, modo Pompei numera mihi, Roma, triumphos,

Nos Boleslai proelia; maior uter?

Pompeium Caesar bello prostravit aperto;

Fraus potuit nostrum vincere sola ducem.