CJ.5.23.0. De fundo dotali.

CJ.5.23.1: Imperatores Severus, Antoninus

Si aestimata praedia data essent in dotem et convenisset, ut electio mulieri servetur, nihilo minus lex iulia locum habet. est autem alienatio omnis actus, per quem dominium transfertur. * sev. et ant. aa. didae. * <a 213 pp. xii k. mart. antonino a. iiii et balbino conss.>

CJ.5.23.2: Imperator Gordianus

Mariti, qui fundum communem cum alio in dotem inaestimatum acceperunt, ad communi dividundo iudicium provocare non possunt, licet ipsi possint provocari. * gord. a. domitianae. * <a 241 pp. v non. oct. gordiano a. ii et pompeiano conss.>