Cap. I. De metris et pedibus.

Metrum Graece, Latine numerus vocatur. Numerus est aequalium pedum legitima ordinatio: huius arsis et thesis partes sunt. Pedum syllabae elementa, numeri modorum elementa, spatia syllabarum ac tempora. [2] Pedes componuntur ex syllabi, ut minimum binis, ut plurimum ternis, incipiunt temporibus binis, ad sex perveniunt. Disyllabi quattuor, trisyllabi octo, plures quam duodecim esse non possunt. Pyrrhichius ex duabus brevibus; cuius exemplum, Deus. Chorius ex longa et brevi, ut Roma. Iambus ex brevi et longa, ut salus. Spondeus ex duabus longis, ut vates. [3] Duo igitur quantitate contrarii, spondeus et pyrrhichius, duorum alter, alter quattuor temporum: duo in ordine, quorum uterque trinorum temporum, iambus et chorius. Ita non plures quam quattuor pedes disyllabi sunt, nec esse possunt. [4] Trinarum syllabarum primus est dactylus, qui constat ex longa et duabus brevibus, cuius exemplum, Aeolus. Huic contrarius anapaestus ex duabus brevibus et longa, ut pietas. Amphibrachus ex brevi et longa et brevi; cuius exemplum avarus. Brachysyllabus ex tribus brevibus, cuius exemplum Cicero. Ei contrarius molossus, ex tribus longis; cuius exemplum Maecenas. Item tres quinum temporum, bacchius ex duabus longis et brevi, cuius exemplum Latona. [5] Huic ordini adversus palimbacchius ex brevi et duabus longis, ut Aquinas. Creticus et amphimacrus ex longa brevi et longa, ut sanitas. Duobus a quantitate contrariis brachysyllabo et molosso, quorum alter trium temporum est, alter sex: ordine tres in quaternis, tres in quinis temporibus.