Liber XI
siue
Mensis October

I. De adoreo et tritico, de hordeo cantherino et eruo et lupino et piso et sisamo et faselo serendis.

Hoc tempore adoreum seremus ac triticum. Iusta satio est a decimo calendas nouembres usque ad sexto idus decembres regionibus temperatis. Nunc etiam laetamen effertur ac spargitur. [2] Hoc etiam mense seremus hordeum, quod dicitur cantherinum. Seritur macra et sicca terra uel satis pingui. Hac uincitur: alteri, non habet amplius, quod noceat, quae semen aliud ferre non possit. [3] Laeto agro non est serendum. Etiam nunc eruum, lupinum et pisum et sisamum seremus, ut dixi: sisamum usque ad idus octobres et faselum, tamen terra pingui aut restibili agro. Quattuor modiis iugerum conplebimus.