[131,1339] Resipiscamus uel sero et
moniti meliora sequamur.
[131,1340] Missos faciamus inutiles labores,
compendiariam uiam astutum hoc genus hominum indicat.
[131,1341] Nos cutem curemus ac uini somnique benigni
(ut ait Flaccus) coelitus expectemus, donec oscitantibus nobis spiritus
illabatur aethereus ac deinde perinde ac fonte Aonio poti repente theologi
prosiliamus, nisi malumus expectare, dum Pauli more uel in paradisum uel in
tertium usque coelum rapiamur audituri, quae nephas sit hominem homini prodere.
[131,1342] Sed statuamus oportet, utrum semel nobis
omnia infundi iubeamus, an quoties usus erit, toties praesto spiritum fieri
malimus.
[131,1343] Equidem posterius hoc longe commodius esse
censeo; nam si semel infundat, noster erit labor meminisse.
[131,1344]
Quare ut memoriam ea sarcina leuemus, satius erit coelesti spiritui omnia
permittere, ille modo praesto fiat, uocatus et inuocatus ut res postulabit,
quantum satis non amplius suggerat.
[131,1345] Scribendus erit liber, aduolet et nobis
securis calamum regat.
[131,1346] Habenda erit oratio, tum uero in columbae
figura ad aurem assideat, linguam ipse temperet, nos modo hiscere meminerimus
ut cum psalmographo rege canere liceat: "Os meum aperui et attraxi
spiritum".
[131,1347] Erunt fortasse, quibus haec acerbius dicta
uidebuntur.
[131,1348] Quid autem acerbum in homines tam
arrogantes dici potest, qui contemptis aliorum egregiis laboribus, ipsi cum
nihil sciant, coelitus tamen docti uideri uolunt?
[131,1349] Ne ego quidem homo poeticus auderem istos
deos lacessere, ni diuus ipse Augustinus in praefatione in libros de Christiana
doctrina, istorum amentiam multis salibus prior elusisset.
[131,1350]
Quo inquit, error iste demum euasisset, si semel animos hominum occupasset?
[131,1351]
Nemo a scientiori se doceri passus fuisset.
[131,1352]
Nullus ad ecclesiasticam concionem properasset, nec quisquam euangelium
pronuncianti praebuisset aurem.
[131,1353]
Haec enim ociosa fuerant futura, si coelitus eruditionem expectandam putassent.
[131,1354]
Addit ibidem, uulgo iactatam fuisse fabulam, de nescio quo, cui citra humanam
operam literarum peritia contigerit, quam ille quidem non magnopere confutat,
parui tamen ducit, propterea quod etiam si maxime uera fuisset, non cuiuis idem
sperandum esset.
|