At Canis ad caudam serpens prolabitur Argo,

conversam prae se portans cum lumine puppim :

non aliae naves ut in alto ponere proras

ante solent, rostro Neptunia prata secantes ;

sed conversa retro caeli se per loca portat.

375

Sicut quum coeptant tutos contingere portus,

obvertunt navem magno cum pondere nautae,

aversamque trahunt optata ad litora puppim ;

sic conversa vetus super aethera labitur Argo ;

atque usque a prora ad celsum sine lumine malum,

380

a malo ad puppim clara cum luce videtur.

Inde gubernaclum, dispersa lumine fulgens,

clari posteriora Canis vestigia tangit.