[5:6] UT QUID ENIM CHRISTUS, CUM ADHUC INFIRMI ESSEMUS, SECUNDUM  TEMPUS PRO IMPIIS MORTUUS EST?

UT QUID ENIM. Merito dixi caritatem diffusam in cordibus nostris, nam propter quid aliud nisi uidelicet ut in nobis dilataretur caritas Dei CHRISTUS MORTUUS EST? SECUNDUM TEMPUS, id est quasi ad horam et in transitu morte detentus qui cito resurrexit, PRO IMPIIS mortuus est, ut eos uidelicet a damnatione liberaret, CUM ADHUC INFIRMI ESSEMUS. Notandum uero est Apostolum hoc loco modum nostrae redemptionis per mortem Christi patenter exprimere, cum uidelicet eum pro nobis non ob aliud mortuum dicit nisi propter illam ueram caritatis libertatem in nobis propagandam, per hanc uidelicet quam nobis exhibuit summam dilectionem, sicut ipse ait:

     Maiorem hac dilectionem nemo habet... etc.

De quo quidem redemptionis modo supra nos satis arbitror disseruisse.