[10:3] IGNORANTES ENIM DEI IUSTITIAM, ET SUAM QUAERENTES STATUERE,   IUSTITIAE DEI NON SUNT SUBIECTI.

Quomodo autem non secundum scientiam statim adiungit, dicens IGNORANTES ENIM IUSTITIAM quam Deus approbat, quae est uidelicet ex fide Christi, ET SUAM, id est quam ipsi pro iustitia reputant et approbant, in obseruantiis scilicet carnalibus, uolentes STATUERE, hoc est immobilem conseruari.

IUSTITIAE DEI, hoc est illis Dei praeceptis quae obedientes iustificant, NON SUNT SUBIECTI, id est obedientes; quale est illud:

     Creditis in Deum, et in me credite.