[10:5] MOSES ENIM SCRIPSIT, QUONIAM IUSTITIAM, QUAE EX LEGE EST, QUI   FECERIT HOMO, VIVET IN EA.

MOYSES ENIM. Ostendit ipsius legislatoris Moysi testimoniis ex iustitia legis impleta, in operibus scilicet illis carnalibus, neminem assequi uitam aeternam nec fuisse promissam, sed potius ex fide Christi.

IUSTITIAM QUAE EX LEGE EST, QUI FECERIT HOMO, hoc est legalia opera impleuerit, VIVET super terram, scilicet IN EA, hoc est propter ipsius legis obseruantiam uitae huius bonis fruetur, non aeternae.