[11:17] QUOD SI ALIQUI EX RAMIS FRACTI SUNT, TU AUTEM CUM OLEASTER    ESSES, INSERTUS ES IN ILLIS, ET SOCIUS RADICIS, ET PINGUIDINIS    OLIVAE FACTUS ES.

QUOD SI ALIQUI EX RAMIS, hoc est aliqui de massa illa fidelium, quod antea recte crediderant adhuc futurum exspectantes, FRACTI SUNT, id est statum pristinum fidei, quem habebant, amiserunt; TU AUTEM, gentilis scilicet, CUM OLEASTER ESSES, hoc est sterilis naturaliter et siluestris, INSERTUS ES IN ILLIS, hoc est aliena operatione loco eorum substitutus, ET SOCIUS RADICIS OLIVAE frugiferae factus per fidem, ET PINGUEDINIS per caritatem. Pinguedo enim calidae naturae est et ideo caritatis ignem significat, et fides radix est et fundamentum caritatis.