[12:18] SI FIERI POTEST, QUOD EX VOBIS EST, CUM OMNIBUS HOMINIBUS    PACEM HABENTES:

SI FIERI POTEST CUM OMNIBUS HOMINIBUS PACEM HABENTES, ita quidem ut diximus, nulli uidelicet malum pro malo reddentes et prouidendo bona etiam coram hominibus.

QUOD, scilicet pacem habere cum omnibus, EX VOBIS EST, hoc est ex propria natura habetis, ut uidelicet eis maxime concordes sitis quos per naturam affiniores conspicitis. Unde et alius dicit apostolus:

     Qui enim proximum quem uidet non diligit, Deum quem non uidet quomodo potest diligere?

Quo enim natura magis sumus affines, amplius ipsa nos ad dilectionem inuitat.