[1:28] ET SICUT NON PROBAVERUNT DEUM HABERE IN NOTITIA, TRADIDIT EOS   DEUS IN REPROBUM SENSUM, UT FACIANT QUAE NON CONVENIUNT.

ET SICUT NON PROBAVERUNT DEUM, hoc est non laudauerunt atque elegerunt Deum quem cognouerant, HABERE IN NOTITIAM, hoc est retinere in memoria ei cohaerendo, TRADIDIT ILLOS DEUS IN REPROBUM SENSUM, hoc est ita penitus excaecari permisit, ut omnino impudentes effecti, nulla penitus honestatis signa in se ostenderent, de qua tamen multa conscripserant; ita UT FACIANT, id est opere impleant, EA QUAE NON CONVENIUNT, non solum quae mala sunt apud Deum, sed quae nulli hominum disciplinae concordant aut aliqua ratione excusari etiam apud impios ualeant.